عمران خان کے بیٹے قاسم خان کا پاکستان کا جی ایس پی پلس اسٹیٹس ختم کرنے کا مطالبہ؟ حقیقت بے نقاب

سوشل میڈیا پر حالیہ دنوں ایک دعویٰ تیزی سے گردش کر رہا ہے کہ سابق وزیراعظم عمران خان کے صاحبزادے قاسم خان نے جنیوا میں اقوامِ متحدہ کی انسانی حقوق کونسل کے اجلاس کے دوران پاکستان کا جی ایس پی پلس اسٹیٹس ختم کرنے کا مطالبہ کیاحقیقت یہ ہے کہ قاسم خان نے جنیوا میں دو مختلف تقریبات سے خطاب کیا، جن میں سے ایک اقوامِ متحدہ کی انسانی حقوق کونسل کا باضابطہ اجلاس تھا۔ اس اجلاس کی مکمل ویڈیو، جو یونائیٹڈ نیشنز ویب ٹی وی پر دستیاب ہے، کے جائزے سے واضح ہوتا ہے کہ انہوں نے اپنی تقریر میں انسانی حقوق اور اپنے والد عمران خان کی قید سے متعلق بات کی، تاہم جی ایس پی پلس اسٹیٹس ختم کرنے کا کوئی مطالبہ نہیں کیا اسی طرح ایک سائیڈ ایونٹ میں بھی انہوں نے پاکستان کے جی ایس پی پلس اسٹیٹس کی معطلی کا مطالبہ نہیں کیا بلکہ اس فریم ورک کے تحت انسانی حقوق کی ذمے داریوں کا حوالہ دیتے ہوئے تنقید کی۔ ماہرین کے مطابق سوشل میڈیا پر وائرل ہونے والی ویڈیو کو سیاق و سباق سے ہٹا کر پیش کیا گیا، جس سے غلط فہمی پیدا ہوئی یہ تاثر اس وقت پھیلا تھا جب 25 مارچ کو سوشل میڈیا پر ایک مختصر ویڈیو شیئر کی گئی، جس میں کہا گیا کہ قاسم خان نے یورپی یونین سے پاکستان کا جی ایس پی پلس اسٹیٹس معطل کرنے کی بات کی ہے۔ اس دعوے کو بعض سیاسی شخصیات، بشمول وزیر دفاع خواجہ آصف اور رکنِ اسمبلی حنا پرویز بٹ کی جانب سے بھی تقویت ملی۔