لندن: بریگزٹ کے بعد برطانیہ اور یورپی یونین کے تعلقات میں اہم پیش رفت ہوئی ہے۔ برسلز میں دونوں فریقوں کے سربراہی اجلاس میں خوراک اور زرعی مصنوعات کی تجارت آسان بنانے، کاربن اخراج کی تجارت کے نظاموں کو جوڑنے اور نوجوانوں کی آمدورفت بڑھانے پر اتفاق ہوا ہے۔خوراک اور زرعی مصنوعات کی تجارت میں سرحدی جانچ کم کرنے پر اتفاق کیا گیا ہے۔ مجوزہ اسکیم کے تحت برطانوی اور یورپی نوجوانوں کو ایک دوسرے کے ہاں تین سال تک کام اور تعلیم کے مواقع مل سکیں گے۔ تاہم برطانوی جامعات میں یورپی طلبہ کی فیس پر اختلاف برقرار ہے۔برطانوی وزیراعظم اینڈی برنہم نے اس پیش رفت کو دوطرفہ تعلقات میں اہم سنگِ میل قرار دیا۔ مشترکہ پریس کانفرنس میں یورپی کمیشن کی صدر اُرسولا فان ڈیر لائن نے کہا کہ زرعی تجارت میں آسانی سے دونوں فریقوں کو فائدہ ہوگا۔ انہوں نے یوکرین جنگ کے تناظر میں برطانیہ کے ساتھ دفاعی تعاون بڑھانے پر بھی زور دیا۔یورپی کونسل کے صدر انتونیو کوسٹا نے کہا کہ یورپ امن کے لیے متحد ہے۔ برطانیہ کی یورپی یونین میں ممکنہ واپسی سے متعلق سوال پر ان کا کہنا تھا کہ یونین برطانیہ کے فیصلے کا احترام کرے گی۔