فخرِ پوٹھوہار راجہ عابد حسین آف مانکراہ کے اعزاز میں پرتکلف ظہرانہ، 15 نومبر کو محفلِ پوٹھوہاری شعر خوانی کا انعقاد ہوگا

پیرس: پوٹھوہار کی دھرتی کے عظیم سپوت، پوٹھوہاری شعرخوانی کے نامور اور بے مثال فنکارراجہ عابد حسین آف مانکراہ کی پہلی مرتبہ یورپ، بالخصوص فرانس آمد کے موقع پر فرانس کے معروف نوجوان بزنس مین چوہدری آصف کی جانب سے ان کے اعزاز میں ایک پرتکلف ظہرانے کا اہتمام کیا گیا، جس میں پوٹھوہار سے تعلق رکھنے والی اہم شخصیات اور دیگر احباب نے شرکت کی۔راجہ عابد حسین صاحب کی آمد کو فرانس میں مقیم پوٹھوہاری کمیونٹی کے لیے ایک تاریخی اور خوشی کا موقع قرار دیا جا رہا ہے۔ ظہرانے میں ابرار کیانی، افضان نواز، راجہ ظہیر، چوہدری محمد فیاض سمیت دیگر معززین شریک ہوئے۔ اس موقع پر راجہ عابد حسین صاحب کی پوٹھوہاری ثقافت اور فنِ شعرخوانی کے لیے گراں قدر خدمات کو خراجِ تحسین پیش کیا گیا۔راجہ عابد حسین صاحب نے اپنی زندگی کے پچاس سال سے زائد عرصے پوٹھوہار کی ثقافت، روایات اور فنِ شعرخوانی کی خدمت میں صرف کیے ہیں۔ ان کی آواز میں پوٹھوہار کی مٹی کی خوشبو، دھرتی سے محبت، لوک روایتوں کی مٹھاس اور ثقافتی ورثے کی بھرپور عکاسی نمایاں ہے۔ ان کی شعرخوانی محض اشعار کی ادائیگی نہیں بلکہ پوٹھوہار کی تاریخ، تہذیب، معاشرتی اقدار اور عوامی جذبات کی ترجمانی کا ایک منفرد ذریعہ ہے۔پوٹھوہاری شعرخوانی پوٹھوہار کی ثقافت کا ایک قیمتی اور زندہ ورثہ ہے۔ اس فن میں شعر کی ادائیگی، مخصوص لے، آواز کے اتار چڑھاؤ، برجستہ انداز اور جذبات کی بھرپور ترجمانی کو بنیادی اہمیت حاصل ہے۔ پوٹھوہاری شعرخوانی نسل در نسل منتقل ہونے والی اس ثقافتی روایت کا نام ہے جو لوگوں کو اپنی دھرتی، زبان اور تاریخ سے جوڑے رکھتی ہے۔ راجہ عابد حسین جیسے عظیم فنکاروں نے اس روایت کو نہ صرف زندہ رکھا بلکہ اسے عالمی سطح پر متعارف کروانے میں بھی نمایاں کردار ادا کیا۔راجہ عابد حسین کو ان کی فنی خدمات کے اعتراف میں سرکاری سطح پر ایوارڈ سے بھی نوازا جا چکا ہے، جو پوٹھوہاری شعرخوانی اور پوٹھوہار کی ثقافت کے لیے ایک قابلِ فخر اعزاز ہے۔ ان کی خدمات اس بات کا ثبوت ہیں کہ علاقائی زبانوں اور ثقافتوں کے فنکار قومی ورثے کے حقیقی محافظ ہوتے ہیں۔اس موقع پر شرکاء نے کہا کہ راجہ عابد حسین صاحب کی فرانس آمد پوٹھوہاری کمیونٹی کے لیے باعثِ مسرت اور اعزاز ہے۔ ان کی موجودگی سے یورپ میں پوٹھوہاری ثقافت کو فروغ ملے گا اور نئی نسل کو اپنی زبان، روایات اور ثقافتی ورثے سے وابستگی کا موقع میسر آئے گا۔ماضی میں پوٹھوہاری ساز بینی کی محفلوں میں عموماً صرف ستار اور گھڑا جیسے روایتی سازوں کا استعمال کیا جاتا تھا، جو اپنی منفرد دھنوں اور دلکش آواز کے ذریعے موسیقی کے شائقین کو مسحور کر دیتے تھے۔ تاہم، وقت کے ساتھ ساتھ اس فن میں جدت اور نئے انداز کی ضرورت محسوس کی جانے لگی۔اس سلسلے میں راجہ عابد صاحب کی ایک نہایت قابلِ تحسین اور عظیم کاوش سامنے آئی، جنہوں نے ساز بینی کی روایتی خوبصورتی کو برقرار رکھتے ہوئے اس میں جدید موسیقی کے رنگ شامل کیے۔ انہوں نے ستار اور گھڑے کے ساتھ طبلہ، ہارمونیم اور دیگر موسیقی کے سازوں کو بھی اس فن کا حصہ بنایا، جس سے ساز بینی میں ایک نئی روح، نیا انداز اور ایک منفرد دلکشی پیدا ہوئی۔راجہ عابد صاحب کی یہ جدت نہ صرف پوٹھوہاری ساز بینی کے فن کو مزید خوبصورت اور دلکش بنانے کا ذریعہ بنی، بلکہ اس روایتی فن کو نئی نسل تک پہنچانے اور اسے جدید دور کے تقاضوں سے ہم آہنگ کرنے میں بھی اہم کردار ادا کر رہی ہے۔بلاشبہ، راجہ عابد صاحب کی یہ کاوش قابلِ فخر ہے، جو ساز بینی کی روایت کو جدت کے ساتھ زندہ رکھنے اور اس فن کو نئی بلندیوں تک پہنچانے کی ایک روشن مثال ہے۔
15 نومبر کو شاہنواز میرج ہال میں محفلِ پوٹھوہاری شعرخوانی کا انعقاد
راجہ عابد حسین صاحب کی فرانس آمد کے سلسلے میں 15 نومبر کو شاہنواز میرج ہال میں ایک شاندار محفلِ پوٹھوہاری شعرخوانی کا انعقاد بھی کیا جائے گا، جس میں راجہ عابد حسین صاحب اپنے منفرد اور دلنشین انداز میں پوٹھوہاری شعرخوانی پیش کریں گے۔یورپ میں مقیم پوٹھوہار سے محبت کرنے والے احباب اس محفل میں شرکت کرکے اپنی ثقافت، زبان اور روایات سے محبت کا اظہار کریں گے۔ یہ محفل نہ صرف ایک عظیم فنکار کو خراجِ تحسین پیش کرنے کا موقع ہوگی بلکہ پوٹھوہاری ثقافت کے فروغ اور اس کے روشن مستقبل کے لیے بھی ایک اہم سنگِ میل ثابت ہوگی۔پوٹھوہار کی مٹی، پوٹھوہاری زبان اور شعرخوانی کی یہ عظیم روایت ہمیشہ زندہ و تابندہ رہے۔